أقر أنا الموقعة أدناه وأنا بكامل قواى العقلية
وحالتى الصحية بمب والحمد لله إنى ......
مش هتجوز !!!!!!
أيوه صدقونى ، أنا بتكلم جد
هتقولوا :
يا إما مجنونة و يا إما عارفة إن مستوى جمالى لا يقل عن
مستوى جمال آثار الحكيم
( فى المسلسل اللى كان اسمها فيه ظريفة وبتضرب العيال
بالطوب )
وقولت أخدها من قصيرها و حفاظا على بريستيجى أرفض
أنا الجواز بدل ما أترفض .
الحقيقة بقى
إنى لا مجنونة ولا وحشة قوى للدرجة دى
كل الحكاية إنى مش متخيلة إنى أتجوز عشان نفس السبب اللى
بتتجوز عشانه معظم البنات فى العصر ده
( عصر الديمقراطية و الوظايف المرمية و الأسعار اللى هيا )
عشان ميتقالش عليا بعد كام سنة ، إنى بقيت .....عانس
عشان كده أقبل أى حد يتقدم لى شايفاه مقبول من كل
النواحى وباستخدام الآله الحاسبة والنسب المفترضة لتحقيق
أرباح من المشروع ده ، أتجوزه و أهى جوازه والسلام ، ده لو
كان عندى 27 سنة ...... أما بقى لو بعد كده يبقى أحمد
ربنا على كل اللى يبعته مش كفاية إن الباشا انطس فى نظره و
عبرنى !!!!!!!!!
هيا دى الحقيقة .... البنات دلوقت بتتجوز عشان الجواز
نفسه... عشان تحس بأنوثتها ..... عشان تتعايق على
أقاربها .... عشان تحقق الحلم اللى جوا كل بنت
( أيوه هو العبيط ده بتاع الحصان الأبيض والفارس اللى
هيرحمها من الشخط و النطر وغسيل المواعين فى بيتها
وهياخدها للجنة الصغيرة اللى هتجمعهم للأبد ! )
والأهم عشان تترحم من كلام الناس اللى وظيفتهم الأولى فى
الحياة إنهم يتحشروا فى اللى مالههومش فيه وهقولكم مثال على
ده فى الحوار التالى ........ ركزوا معايا بس
قرشانة ( 1 ) : اسكتى .... مش سعاد جالها عريس
قرشانه ( 2 ) : أيوه يا أختى بيقولوا شغال فى شركة أم نبيل بتاعة المحمول
قرشانه ( 1) : ده ناوى يجيبلها شقة أربع مطارح وصالة
قرشانه ( 2) : بس باين عليهم مش متفقين على الشبكة دى
أم سعاد عاوزاها مش أقل من 10 آلاف جنيه والعريس قال
كتير كفايه 5 آلاف بس
قرشانه ( 1 ): بصراحه عنده حق يعنى هيا سعاد ملكة جمال
، أمال لو كانت أصغر شوية دى عندها 28 سنة دلوقتى ...
تحمد ربنا أمال نوال وسوسن وإلهام .....اللى عدوا ال 30
يعملوا إيه ؟؟؟
قرشانه ( 2 ): عندك حق ياختى ده لا جامعه نافعه ولا شغل
نافع ولا دلال نافع ، القصد ...احنا مالنا احنا عندنا ولايا !
دول قرشانات الاستطلاع اللى كل شويه
( هى يا اختى اسم النبى حارسها لسه مجلهاش عريس .... ربنا يعدلهلها يارب )
شوفتوا ...............
يرضيكم كده
كم الكلام والنظرات اللى بتتعرضله البنت عشان متجوزتش
كأن ده ذنب أرتكبته !!!!!
أمال الاكتئاب جه لحوالى 4 مليون بنت ليه
( عدد البنات اللى فوق ال 35 وفاتهم قطر الجواز )
وتبتدى البنت تلجأ للنت و الشات وعلاقات الموبايلات
والتودد لزمايلها فى الشغل
بقى بدل ما البنت تتجوز علشان لقت الانسان اللى يناسبها
نصها التانى زى ما بيقولوا
وحصل بينهم ارتياح وحب
( مش لازم يعنى قصة حب مولعة )
لكن على الأقل يكون فى ارتياح وتوافق
( وبرده مش لازم يكون زى نجوم السيما )
لكن باختصار هو الشخص اللى تحسى إنك فى منتهى التلقائية
و السعادة و أنتى معاه
( بالعربى كده : اللى ياخدك بعبلك )
آهههه عارفة ..... هتقولوا عليا رومانسية و خيالية وإن
الكلام ده مبقاش ينفع دلوقت
هأقول مااااااااااااااشى
بس مش معقول برده الجواز يتحول لمجرد مظهر اجتماعى
وهروب من شبح العنوسة
و تكوين حياة .... أى حياة والسلام !!!!
لا لا أفضل أن أن أبقى رومانسية ولا إنى أبقى مدام نكدية
ولسه عند رأيى
مش هتجوز بالطريقة دى أبدا
وانتوا بقى ناويين تتجوزوا اى جوازه والسلام ولا تيجوا تقولوا معايا
مش هنتجوز بالطريقة دى
السبت يناير 19, 2008 12:04 pm